በጋምቤላ ማረሚያ ቤት በተነሳ ግጭት 92 ታራሚዎች አመለጡ

ጋምቤላ ከተማ ዙሪያ ዞን ማረሚያ ቤት ከተፈጠረው የእርስ በእርስ ግጭት ጋር ተያይዞ 92 ታራሚዎችና ተጠርጣሪዎች አምልጠው መውጣታቸውን ማረሚያ ቤቱ አስታወቀ።

ከማረሚያ ቤቱ የወጡት ታራሚዎች ላይ ክትትል እያደረገ መሆኑን አስታውቋል።

የዞኑ ማረሚያ ቤት አዛዥ ረዳት ኢንስፔክተር ጆን ኡሞድ እንደገለጹት በውሃ ምክንያት በሁለት ግለሰቦች መካከል የተነሳ አለመግባባት ሰፍቶ ወደ ግጭት በማምራቱ ከ316 ታራሚዎችና ተጠርጣሪዎች መካከል 92ቱ አምልጠው ወጥተዋል።

ታራሚዎችና ተጠርጣሪዎች ሊያመልጡ የቻሉት በወቅቱ በማረሚያ ቤቱ በቂ የፖሊስ ኃይል ስላልነበረ መሆኑን አሰታውቀዋል።

በግጭቱ በሶስት ሰዎች ላይ ከደረሰው መጠነኛ መቁሰል በስተቀር በህይወት ላይ የደረሰ ጉዳት አለመኖሩን ረዳት ኢንስፔክተር ጆን ኡሞድ ተናግረዋል።

በአሁኑ ወቅት ከፌዴራልና ከክልል የፀጥታ አካላት አስፈላጊው ኃይል ተጨምሮ የማረጋጋት ስራ በመከናወኑ የተሻለ ሁኔታ መፈጠሩንም ማስታወቃቸዉን ኢዜያን ጠቅሶ ፋና ዘግቧል፡፡